O Ano Díaz Castro en Galaxia

A produción da exposición "Nimbos de luz", que se inaugura o 19 de febreiro en Guitiriz, patrocinada pola Cosellería de Cultura da Xunta de Galicia e comisariada por Afonso Blanco Torrado, Armando Requeixo e Luis González Tosar, abre os actos e as celebracións do Ano Xosé María Díaz Castro, o autor de Nimbos (1961), a quen a Real Academia Galega dedica este ano o Dia das Letras Galegas.
Escolleuse o 19 de febreiro para inaugurar a exposición porque tal é a data de nacemento do poeta, na aldea dos Vilariño, parroquia dos Vilares, no antigo concello de Trasparga, hoxe Guitiriz, en 1914. Ao acto teñen anunciada a súa asistencia os fillos de Xosé María Díaz Castro, residentes en Madrid e Euskadi.
Editorial Galaxia publicou a primeira edición de "Nimbos" no ano 1961 e este ano facemos un importante esforzo para dar a coñecer a vida e obra do autor. A exposición vai acompañada dunha produción audiovisual de Xosé Antonio Cascudo, que tamén se presentará ese día 19 de febreiro na vila luguesa, así como Vida e Obra de Díaz Castro, da que é autor Armando Requeixo (colección Letras Galegas).
Requeixo é nestes momentos o gran especialista en Díaz Castro. A próximo día 28 lerá na Universidade de Santiago a súa tese de doutoramento sobre o poeta, dirixida por Carme Blanco e Claudio Rodríguez Fer. Inmediatamente publicaremos a Poesia Galega Completa de Díaz Castro, editada, anotada e comentada polo propio Armando Requeixo, na colección Obras Completas.
O poeta Luis Gonzalez Tosar, que mantivo unha estreita relación con Díaz Castro nos derradeiros anos da vida do de Guitiriz, sobre todo a través das páxinas da revista Dorna, edita e comenta a definitiva fixación do texto de "Nimbos", coa participación en vida do propio autor, que presentaremos na colección Dombate o 21 de marzo, Día Universal da Poesía.
Outro coñecedor e íntimo amigo de Díaz Castro, o ensaista e sacerdote Alfonso Blanco Torrado, presidente da Asociación Xermolos, será o encargado de organizar a fotobiografía de Díaz Castro ("Nimbos de luz", 1914-1990) cunha importante achega gráfica e documental, ensaios de González Tosar e Armando Requeixo, así como unha versión mais ampla da produción audiovisual de Xosé Antonio Cascudo. Un esforzo importante da nosa editorial, que iremos comentando máis de vagar en próximas entregas.