No pasado mes de marzo, 28.097 persoas visitaron libros galegos de Editorial Galaxia a través do portal Google Books. Isto significou un aumento do 15% respecto do mes anterior, no que se registraron 24.437 visitas.
Editorial Galaxia asinou hai un anos un acordo co buscador internacional para promocionar e dar a coñecer o seu catálogo de títulos e autores na Rede. Os libros poden ser consultados ata un 20% do seu contido, aínda que de ningunha maneira descargados, nin impresos, nin copiados, para o que están establecidos os correspondentes protocolos de seguridade. Google, en opinión de Editorial Galaxia, pode ser un magnífico escaparate para dar a coñecer a nosa literatura e a nosa cultura no mundo, mesmo que a comercialización da mesma se faga sempre a través da propia editora ou a través da rede de librerías, perfectamente localizadas a través de Google Maps.
O maior número de solicitudes e visitas de libros de Editorial Galaxia en Google realizouse no pasado mes de outubro (arredor de 30.000), e os libros máis solicitados seguen sendo os dicionarios e os de cociña. Entre os títulos máis significativos están La cocina gallega, de Álvaro Cunqueiro, A cociña de Larpeiros, de Benigno Campos, e a novela Ollos de auga, de Domingo Villar.
