O vindeiro sábado 9 de novembro terá lugar un Encontro de irmandade entre a Asociación Monteira, de Vigo, e a Asociación Pesdebarro, de Vilagarcía, para compartir o pracer de bailar xuntos danzas tradicionais do mundo.
O encontro será no Liceo-Casino de Vilagarcía de Arousa.
Comezará ás 11 cun obradoiro das danzas que forman parte do libro De roda en roda. Músicas e danzas do mundo, editado por Editorial Galaxia, dirixido por Suso Cancelas, un dos autores do libro e membro de Monteira, no que participarán os membros de ambas asociacións e aquelas persoas que se queiran apuntar.
Seguirá cun xantar, ás 13:30, ao que cadaquén levará algo para compartir co resto dos compañeiros, comida e/ou bebida, o que desexe.
Arredor das 16:30 continuará o obradoiro de De roda en roda, ata as 17:30, e despois ás 18 horas, farase unha presentación do libro ao público xeral e medios de comunicación, na que participarán Suso Cancelas e os tamén coautores Pilar Sampil e Javier Jurado.
Ao remate do acto, baile aberto, con bailes do libro entre ambas asociacións e o público asistente, ata rematar arredor das 19:30.
O programa está aberto a todo aquel que queira participar, para pasar o día danzando!
Menu
Menu
