A finais do curso pasado presentamos a Aula Virtual de Editorial Galaxia, unha ferramenta para complementar o ensino da lingua e literatura galegas. Daquela, amosabamos unha serie de mostras para que o profesorado e alumnado galego se fixese unha idea de como funcionaba. Agora, son xa moitos e moitas os que están a gozar desta nova maneira de, dende o computador, o iPad, o móbil e calquera outro dispositivo con conexión á rede, axudarse na aprendizaxe da nosa lingua e literaturas.
A Aula Virtual de Galaxia achega, entre outras cousas, versións en PDF dos libros de texto, material educativo dixital e propostas de actividades docentes interactivas. A maiores, hai xa un servizo específico para docentes que dá acubillo a arquivos sonoros en libre descarga (máis de 300) e unha completa listaxe de accións de tipo didáctico para cada nivel, entre outras cousas.
