Galicia, o país das marabillas

 Nacín no barrio compostelán do Castiñeiriño o 30 de decembro de 1972. Dende nena adoraba ler, escribir e facer entrevistas, e por este motivo estudei Xornalismo e Filoloxía Inglesa na USC e levo traballando no eido da comunicación dende 1995.

Na actualidade vivo coa miña familia (Toño, Darío e Xulia) e os meus gatos (Traski e Filipín) en Penelas, unha fermosa aldea do concello de Teo con vistas ao Pico Sacro.

Boa parte do meu tempo transcorre en Corme, na costa da Morte, territorio de fonda pegada nos meus poemas dos últimos anos.

Conto con varios recoñecementos literarios pola miña obra poética, entre eles o Duck Fin, o  María Mariño e o Xosé Manuel López Ardeiro.

En decembro de 2005 publiquei o meu primeiro libro individual, Adagio para unha viaxe silente, e en 2018 viu a luz o segundo, Ser, corazón e boca, e o compositor Fernando Vázquez Arias vén de poñerlle música a catro poemas meus: “Amor é mar”, “Corme”, “Camiño dos Faros” e “Azul”.

Para min, a poesía é unha maneira de entender a vida.