O pasado martes presentouse na Feira Internacional do Libro Infantil e Xuvenil de Boloña o catálogo Galician Books for Children & Young People, que recolle produción galega destinada ao público máis novo do último ano. No acto interviñeron o subdirector xeral de Bibliotecas, José Daniel Buján Núñez; Manuel Bragado, presidente da Asociación de Editores Galegos, e Francisco Castro, presidente da Asociación Galega do Libro Infantil e Xuvenil (GÁLIX) e editor da liña de infanto-xuvenil da nosa editorial. O catálogo realizouse en versión trilingüe, para garantir o acceso das linguas maioritarias da nosa contorna cultural, que serven tamén de ponte cara a outras demográficamente máis pequeñas.
Esta presentación, coa que cada ano as entidades implicadas e a Consellería de Cultura e Turismo da Xunta de Galicia impulsan no plano internacional a imaxe da edición galega destinada ás primeiras etapas da vida das persoas, confirma o crecemento de Galicia na calidade dos títulos ofertados, así como una presenza cada vez máis importante no exterior. Neste momento, contamos con editoriais que traballan simultaneamente en varias linguas, incluídas a inglesa e a castelá, e con ilustradoras e ilustradores demandados desde os países máis avanzados neste eido de Europa e de América.
Con todo, os profesionais e entidades vencelladas ao mundo da literatura infantil e xuvenil, e da edición en xeral, consideran que o momento de cambio que está a experimentar o libro, canto a contidos e soportes, e no que atinxe aos retornos económicos derivados da produción, require una atención especial para ocupar os novos espazos da globalidade, nos que os sistemas de comunicación e de información permítenlle á tradicionalmente considerada periferia competir en igualdade cos centros importantes recoñecidos ata o momento. Nesa liña hai que entender o interese que está a obter o proxecto Contoplanet entre os distintos editores do mundo que se achegan ao stand galego onde se atopan os nosos editores destacados na cidade italiana.
